Banda Nagarayata Pemineema

තුම්පනේ නමැති ග්‍රාමයේ උඩරට පෙළපතකින් පැවත එන සෑහෙන පොහොසතෙකු වූ නිළමේගේ බිරිඳ වැදගත් පවුලක කාන්තාවකි.මෙම අඹුසැමි දෙපළගේ එකම පුත්‍රයා වූයේ තරුණ වියේ පසුවන බංඩාය.බංඩාට මෙන්ම නිළමේටද කොළඹ නගරයේ සිරි නැරඹීමේ ආශාවක් ඇතිවිය.ඒ අනුව නිළමේ, මැණිකේ සහ බංඩා අගනුවරට සේන්දු වූහ.තම ගමේදී නොදකින බොහෝ දේවල් කොළඹදී දැකීම තුළින් ඔවුන් මහත් ප්‍රීතියට පත්වින.

කොළඹ නගරයේ ගැටකපන්නෙකු නොහොත් පික්පොකට් කප්පිත්තෙකු වන අප්පුහාමිගේ දෙනෙතට මෙම තිදෙනා ලක්වීම තුළින් තමාට සුදුසු ගොදුරක් ලැබීමේ වාසනාව උදාවන වග සිය අත්දැකීමෙන් වටහාගත් අප්පුහාමිට ඔවුන් හා කුළුපඟ වීමට එතරම් කාලයක් ගතකිරීමට අවශ්‍ය නොවින.මෙම ගොඩේ පිරිසගේ සකල සබ්බ මනාවම සූරාගැනීමේ පරමාර්ථයෙන් නිළමේ සමඟ කුළුපඟ වූ අප්පුහාමි ඊට සුදුසු අවස්ථාවක් බලා සිට නිළමේගේ මුදල් පසුම්බිය සොරාගත්තේය.

තම මුදල් පසුම්බිය නොමැති බව දැනගත් නිළමේට දවල් තරු පෙනිනි.කෙසේ නම් ගමට යාමට වියදම් සොයා ගනිම්ද යන සිතුවිලි වලින් නිළමේ පීඩාවට පත්ව සිටියදී අප්පුහාමි තම බොරු හිතෛෂිවන්තකම් පෙන්වමින් ගමට යාම සඳහා තමා මුදල් දෙන බවට සහතික වීමෙන් නිළමේ ඉන් සෑහීමට පත්විය.අප්පුහාමි තමා සොරාගත් නිළමේගේ මුදල් වලින් කොටසක් ඔහුට දෙන ලද්දේ මහා පරිත්‍යාගයක් ලෙසටය.අප්පුහාමිගේ එම උදව්වට මුව නොසෑහෙන සේ ස්තූතිය පළකල නිළමේ ආපසු ගම්බිම් බලා පිටත්වූයේ තුම්පනේ තම නිවසට පැමිණෙන ලෙසට ආරාධනයක්ද කරමිනි.

තම බඩ වඩා ගැනීමට මීට වඩා සුදුසු පුද්ගලයෙකු තවත් නැතැයි තේරුම්ගත් කපටි අප්පුහාමි දින කිහිපයකට පසු තුම්පනේ බලා ගියේය.කොළඹදී අමාරුවේ වැටී සිටි අවස්ථාවේදෙ තමාට බෙහෙවින් උදව්කළ අප්පුහාමි කෙරෙහි පැහැදී සිටි නිළමේ ඔහුව මහත් ආදරයෙන් පිළිගෙන අහාරපානාඅදියෙන් සංග්‍රහ කරනු ලැබීය.

මෙහිදී නිළමේ විසින් පැවසුවේ තම පුත් බංඩා යළිත් වරක් කොළඹ යාමට නිතරම ඇවටිලි කරන බවයි.මීට වඩා ඉල්ලමක් කිසිදා හදාගත නොහැකි බව වටහාගත් අප්පුහාමි බංඩාව කොළඹ කැටුව ගොස් ඉංග්‍රීසි බස, සිරිත් විරිත් ගතිපැවතුම් පුරුදු පුහුණු කරවා තුම්පනේ ග්‍රාමයේ උගත් වැදගතෙකු කරන බව පැවසූයෙන් නිළමේ සහ මැණිකේ ඊට කැමැත්ත දෙනු ලැබුවේ තම පුත් බංඩා එවන් උසස් පුද්ගලයෙකු බවට පත්වීම ගැන සතුට පළකරමිනි.

බංඩා කැටුව කොළඹ පැමිණි අප්පුහාමි තම හිතවතෙකු වූ නෝබට් නැමැත්ත කැඳවා බංඩාට ගති සිරිත්, කතා බහ පුරුදු කරන ලෙසට උපදෙස් දුන්නේය.තම පුත්‍රයාගේ ඉගෙනීමේ කටයුතු සඳහා අවශ්‍ය වියදම් සපයන බව නිළමේ පොරොන්දු වීම නිසා එතැන් පටන් අප්පුහාමි වරින් වර විශාල වශයෙන් නිළමේගෙන් මුදල් ගෙන්වා ගත්තේය.එයිනුදු සෑහීමකට පත්නොවුනු අප්පුහාමි එකවරම නිළමේගෙන් විශාල මුදලක් ලැබගැනීමේ අටියෙන් බංඩාට උසස් පවුලක් තරුණියක වූ මාලිනිව ජෝඩු කරවීමට කටයුතු කළේය.හිසෙහි එකුදු හිස කෙසක් නොමැති ඇය තට්ට ගැහැණියකි.ඒ බව දැනගත් ඇගේ කලින් පෙම්වතාද ඇයව අතහෑ දැමුවේය.මේ කිසිවක් නොදත් බංඩා, මාලිනිගේ බාහිර රූපයට රැවටී ඇයව විවාහ කරගැනීමට තීරණය කරගත්තේ ඇය බොරු කොණ්ඩයකින් සැරසී සිටින වග නොදැනය.

කොළඹ අප්පුහාමිගේ විවිධ උප්පරවැට්ටි සඳහා උදව්පදව් කරන බ්‍රෝකර් කෙනෙකු වූ සිල්වා, අප්පුහාමිට බෙහෙවින් ප්‍රයෝජනවත් වූවෙකි.ඔහු අප්පුහාමිගේ බිරිඳ වූ මිසෝ සමඟ ද අයුතු යාළුකම් පවත්වමින් ඇයව රහසින් ගෙනයෑමට සැළසුම් කරන බව දැනගත් අප්පුහාමි කෝපයෙන් යුතුව සිල්වා පන්නා දමනු ලැබීය.මේ නිසා අප්පුහාමි කෙරෙහි සිල්වා තුළ දැඩි වෛරයක් ඇතිවිය.ඔහු කවදා හෝ අප්පුහාමිගෙන් පළිගැනීමේ චේතනාවෙන් පසුවිය.

මාලිනි කෙරෙහි බංඩාගේ සිත බිඳිය නොහැකි තරමට දැඩි වූ කල්හි ඔවුන්ගේ විවාහ මංගල්‍ය කඩිනමින් කිරීමට අප්පුහාමි විසින් කටයුතු සූදානම් කරන බව දැනගත් සිල්වා අප්පුහාමිගෙන් පැරණි කෝන්තරය පිරිමසාගැනීමේ අදිටනින් විවාහය පිළිබඳ සියළු විස්තර නිළමේට දැන්වූ කල්හි තම පුතුගේ විවාහය නිසා සිය පරම්පරාවේ ගෞරවයට කැළලක් ඇති කල අප්පුහාමිගෙන් පළිගැනීමේ අදහසින් නිළමේ මැණිකේත වහා කොළඹ පැමිනි නමුත් ඒ වනවිට බංඩාගේ සහ මාලිනිගේ විවාහය සිදුකර අවසාන වී තිබින.

මෙතෙක් කාලයක්ම මාලිනි බොරු කොණ්ඩයකින් සඟවාගෙන සිටි තට්ට හිස දුටු බංඩා ඒ සියල්ල අමතක කර තම සිත හදාගනිමින් මව්පියන් දෙදෙනාද සමාකරවාගෙන ජීවිතය සතුටින් සාමයෙන් ගෙවීමට තීරණය කරගත්තේය.විවාහය සිදුකෙරෙන අවස්ථාවේදී හදිසියේම එතැනට පැමිණෛ පොළිස් නිළධාරින් විසින් අප්පුහාමි සිරභාරයට ගනු ලැබුවේ ඔහු ඔරලෝසුව සහිත වටින රන් මාලයක් සොරකම් කිරීමේ චෝදනාව මතය.සෑමදාකම කපටි කමින් ජීවත්විය නොහැකි බව ඒ අවස්ථාවේදි අප්පුහාමිටා පසක්වූවාට සැකයක් නොමැත.

කලාභූෂන-වැළිහිඳ මුනිරත්න